መግለጺ ደገፍ ንጠቕላላ ጉባኤ ኤዲኪ

ዝኸበርኩም ኣባላት መሪሕነት ኤዲኪ፡

ዝኸበርኩም ኣባላት ኣሰናዳኢ ሽማግለ ኤዲኪ፡

ዝኸበርኩም ዕዱማት ኣጋይሽ፡

ብቐዳምነት ኣብ መኽፈቲ ጉባኤኹም ተረኺብና ቃል ኤርትራዊ ደሞክራስያዊ ግንባር ከነቕርብ ንዝገበርኩምልና ዕድመ ዕዙዝ ገድላዊ ምስጋናና እናቕረብና ዕዉት ጉባኤ ክገብረልኩም ንምነ።

ዝኸበርኩም ጉባኤኛታት፡-

ጉባኤኹም ፖሎቲካዊ ወድዕነት ኤርትራ ካብ ዝኾነ እዋን ንላዕሊ ብውሽጥን ብደገን ንለውጢ ምቹእ ኩነታት ኣብ ዝተፈጥረሉ ህሞት ይካየድ ምህላው ፍሉይ ኣገዳስነት ከም ዘለዎ ንግንዘብ። ከመይሲ ገባቲ ስርዓት ካብ መላእ ህዝቢ ኤርትራ ብሓፈሻ፡ ካብ ኣባላት ሓይልታት ምክልኻል ድማ ብፍላይ፡ ከምኡ’ውን ካብ ማ/ሰብ ዓለም ጠቕሊሉ ተነጺሉ ኣንጻሩ ዝካየድ ዘሎ ኩሉ-መዳያዊ ቃልስታትን ተጽዕኖታትን ጻዕጺዕዎ ዕለተ ውድቀቱ ኣብ ዝቐራረበሉ እዋን ስለ ንርከብ። ህዝብና እኩብ ድምር ናይ'ቲ ንዓመታት ኣብ እንግድዕኡ ተደሪዑ ዝጸንሐ ንሕስያ ዘይብሉ ግፍዕታትን ግህሰታትን ኣብ ክጻወረሉ ዘይክእል ደረጃ በጺሑ ሎሚ ኣይፋልን ካብ'ዚ ንላዕሊ በደላት ኣይስከምን!! እምቢ ንባርነት እወ ንሓርነት!! ብምባል ድምጺ ፍትሕን ሓርነትን ኣብ ዘቃልሓሉ እዋን በጺሕና ምህላውና ብሩህ እናኾነ ይመጽእ ኣሎ። እቶም ውጹዓት ኣባላት ሓይልታት ምክልኻል ኤርትራ፡ ኣብ'ዚ እዋን’ዚ ፖሎቲካዊ መንነት ናይ'ቲ ስርዓት ብግቡእ ብምልላይ፡ ኣብ ጎኒ’ቲ ፍትሓዊ ሕቶታት ህዝቦም ተሰሊፎም ሓንጎልን ኣብራኽን ህግደፍ ንምስባር ምሉእ ድልውነት ዘረጋግጽሉ ግዜ ምዃኑ እውን ምልክታቱ እናዓበየ ይመጽእ ኣሎ። ምንቅስቓስ 21 ጥሪ 2013 ብውጽኢቱ ዝካየድ ዘሎ እምብይታን ቃልስታትን ናይ'ዚ ዓቢ ምልክትዩ። ካብ'ዚ ብምብጋስ ጉባኤኹም ነዚ ኩነታት’ዚ ብደቂቕ ተገንዚቡ፡ ብሩህ ራእይን ስትራተጂን ጨቢጡ ክወጽእ ተስፋ ንገብር።

ብምኽንያት 08 መጋቢት 2013 ዓለም-ለኻዊ መዓልቲ ደቂ-ኣንስትዮ ዝተዳለወ ግንባራዊ መግለጺ

08 መጋቢት ኣብ ታሪኽ ቃልሲ ውጹዓት ደቂ-ኣንስትዮ ዓለምና ፍሉይ ምዕራፍ ዘለዋ ዕለት’ያ፡፡ 08 መጋቢት ንዘመናት ኣብ ልዕሊ ደቂ-ኣንስትዮ ንዝወርድ ዝነበረን ዘሎን ድርብ ወጽዓ ካብ ሱሩ ንምምሓዉ ናይ ዝተጀመረ ነዊሕ መስርሕ ተጋድሎ ፈላሚትን ንሓድሽ ደሞክራሲያዊ ባህሊ ቡቕሊ ዝተኸለትን ታሪኻዊት ዕለት’ያ፡፡ ምእንቲ’ዚ ልዕሊ ሓደ ክፍለ-ዘመን ዝተካየደ መሪር መስተንክራዊ ተጋድሎ ደቂ-ኣንስትዮን ንስሊኡ ዝተኸፍለ መስዋእትን ብምዝካር፡ መኽሰባቱ ዓቒብካ ንዝለዓለ ተጋድሎ ሰንደቕ-ዕላማ 08 መጋቢት ብምልዓል ንዝበለጸ ዓወታን ድምቀታን ኣብ ደንበ ፍትሓውን ማዕርነታውን ሱታፌ ደቂ-ኣንስትዮ ብልቢ ዝኣምኑ ሓይልታትን ዋናታታን ዝዝክርዋ፡ ብኣርማ ጽንዓትን ቃልስን እትምሰል ረዛን ዕለት’ያ፡፡ ከም ኣካል’ቲ ናይ ዝሓለፈ ዝኽርታትና ድማ እነሆ ሎሚ ንመበል 105 ግዜ 08 መጋቢት 2013 ብክብ ዝበለ ናይ ቃልሲ፣ ጽንዓትን ዓወትን ታሪኻዊ ኤርትራዊ መንፈስ ተላቢስና፡ “ድሕነት ህዝብን ሃገርን ንምርግጋጽ ኩሉ ዓቕምታትና ኣንጻር ቶታሊታርያዊ ስርዓት ኢሳይያስ ይቕናዕ” ንዝብል መሪሕ ጭርሖ ግብራውነት፡ ኣብ ሓደ መስርዕ ብምዕሳል ታሪኻዊ ሓላፍነትና ክንፍጽም ኣብ እንጥለበሉ ልዳት ደሞክራሲያዊ ለውጢ ኮይንና ነብዕላ ምህላውና ፍሉይ ድምቐት ዘለዎ’ዩ፡፡

ኤርትራውያን ደቂ-ኣንስትዮ ንዘመናት ኣብ ልዕሊኤን ንዝበጽሕ ዝነበረን ዘሎን ጾታውን ደርባውን ወጽዓታት ብምቅዋም፡ ማዕርነታውን ፍትሓውን ተሳትፎ ደቂ-ኣንስትዮ ዓለምና ንምርግጋጽ ኣብ ዝተገበረ መስተንክራዊ ጅግንነት ጉቡአን ብምፍጻም፡ ፊታውራሪ ናይቲ ዝተመዝገበ ድሙቕ ታሪኽ 08 መጋቢትን ዕላማታታን ኽኾና ናይ ዝበቕዓ ኣፍሪካውያን ብጾተን መሳርዕ ዝዳረግ ታሪኽ ጅግንነት በዓል-ቤት እየን፡፡ ንዱሑር ሕብረተሰብኣዊ ማሕለኻታት ሰጊረን ኣብ ኣደባባያት ድምጸን ዘስምዓ ዋዕሮታት ኤርትራ እልፊ ደርዘን ታሪኽ ሰኒደን’የ፡፡ ኣብ መስርሕ ነጻነታዊ ተጋድሎና፡ ምስ ደቂ-ተባዕትዮ የሕዋተን ማዕረ ተሰሊፈን ግን ከኣ ሕልፊ መስገደል እናሰገራ፡ ብዋጋ ከቢድ መስዋእቲ ዘልኣለማዊ ትእምርቲ ሓወልቲ ነጻነተን ኣምቢረን’የን፡፡ ካብ ቅድመ-ግንባራት ጀሚርካ፣ ድሕረ-ግንባራትን ኣብ ከርሲ-ጸላኢን ተሰሊፈን ነጻነታዊ ተጋድሎና ንምዕዋት ሞባእ-ህይወት እናኸፈላ፡ ንጹንኩር መድረኻት በዲሄን ግምጃ-ነጻነት ከዲነናና እየን፡፡ ብርግጽ ተራ ደቂ-ኣንስትዮ ኤርትራ ኣብ ነጻነታዊ ተጋድሎና ብሓንቲ ሕጥቦ-ጽሑፍ ንምግላጹ ምፍታን ምስ ድፍረት ዝቁጸር ምዃኑ ኣይሰሓትናዮን፡፡ ስለዝኾነ ከኣ ብጥቕልሉ ኤርትራውያን ደቂ-ኣንስትዮ መትንን ዓንድን ሰውራና ኔረን እንተኢልና፡ ንውዕለተን ዝገልጽ ዘይተጋነነ ሓቂዩ ዝብል ዕግበት ኣለና።